探索香港常見電動單車型號 香港人用邊款電動單車？
電動單車喺香港雖然仲未合法化，但係喺香港街頭仍然隨處可見，踩電動單車嘅人除咗用嚟代步嘅普通市民之外，亦都有唔少係外賣仔。
如果你係反對電動單車嘅，你有冇諗過：
雖然電動單車仲未合法化，市面上又冇乜電動單車買，咁點解條街上面又有咁多電動單車？
如果你係支持電動單車嘅，你又有冇諗過：
香港人可以點樣買電動單車？邊隻型號比較好？今日呢篇文章嘅主題係探討下香港常見嘅電動單車類型同埋型號，無論你對電動單車嘅立場係咩？，相信呢篇文章都可以解答到你對電動單車嘅問題。
香港電動單車種類
據我喺條街上面同埋網上（包括Carousell，Facebook MarketPlace，同埋新聞上面比警察扣留嘅電動單車圖片） 嘅觀察，我會將電動單車分為四大類
第一類：摺疊電動單車
第二類：山地電動單車
第三類：自行組裝嘅電動單車
第四類：粗胎電動單車
唔同種類電動單車嘅常見型號同款式
第一類嘅摺疊電動單車，體積細，價錢平，電池又通常可以拆出叉電，無論係摺埋成部放入屋，定係單獨拆粒電池上樓叉電，都十分之方便，啱晒香港人用，係香港最常見嘅電動單車類型。
常見型號：
Vooka
沃伽牌電動單車
呢款電動車車身小巧，電池收埋喺車架裏面，隱蔽性高，相對唔容易俾人發現，喺香港隨處可見。
Lanke Leisi 電動單車
喺香港都幾受歡迎嘅電動摺疊單車，亦受南亞外賣員歡迎
Baicycle 小白電動單車
Zhengbu 正步電動單車
Jetson haze電動單車
第二類嘅山地電動單車，體積比較大，車呔都比較大，部份型號電池又可以取出充電，有啲型號亦可摺疊，係香港常見嘅電動單車類型。
常見型號：
Omeci/Geruitop/Plenty牌電動單車
呢三隻牌子嘅電動單車設計大同小異，可摺疊，深受香港嘅南亞外賣仔歡迎
跨步式車架單車（例如鳳凰L8)
採用跨步式車架設計，方便上落，通常唔可以摺疊，電池亦都未必可以拆卸叉電，常見品牌有Phoenix鳳凰，Flying Pigeon 飛鴿等
第三類嘅自行組裝電動單車，係用普通單車車架加上電機電池而成，因為隱蔽性同埋可以自行選擇較大嘅電機同埋電池而深受外賣員歡迎
第四類粗呔（fat tire)電動單車，喺香港相對比較少見，但係都有一部份嘅人使用，包括外賣員。
常見型號：
Shengmilo 電動單車
仿Super73電動單車
仿美國品牌super73嘅電動單車，型格設計，一揸出街，即刻成為全場焦點。
電動單車來源
以上電動單車多數為中國大陸品牌，喺香港並冇發售，相信係由大陸網購渠道，例如淘寶或拼多多購買。香港法例並冇禁止電動單車入口，只係禁止喺路面上使用，但係由於電動單車體積較大，如果採用網購形式購買，通常冇包郵，要另外俾多啲運費，或者用私人集運公司運送到港。
香港本地網上二手市場，如Carousell, Facebook MarketPlace亦有不少二手電動單車放售。
萬一踩電動單車俾警察捉到，罰幾重？
萬一喺香港踩電動單車車被警察捉到，你嘅電動單車會即時俾警察扣留，你亦會收到傳票，要喺指定時間上庭認罪，通常罰款約$2000，或者五日社會服務令，同埋停牌一年，由於駕駛電動單車所犯嘅罪行（無牌駕駛丶駕駛未登記車輛及無第三者保險）唔係須留案底罪行，所以初犯基本上唔會留案底。被扣嘅電動單車會喺之後俾返你。
其他類型嘅電動單車香港有冇？
有，例如大陸常見嘅仿綿羊仔電動單車（例如九號、小牛、雅廸品牌推出嘅型號）
越野電動單車（如Surron Light Bee輕蜂）
但係以上嘅電動單車相信係因為隱蔽性較低，價錢較貴等等原因，喺香港比較罕見。
總結
支持電動單車嘅你，睇完呢篇文有冇揀啱邊款電動單車？你又支唔支持電動單車合法化呢？不妨留言表達你嘅意見。
反對電動單車嘅你，睇完呢篇文又有冇加深你對電動單車嘅認識同埋理解？你覺得政府對非法使用電動單車嘅刑罰夠唔夠？不妨留言表達你嘅意見。
(圖片來源包括Carousell Facebook 等）
留言
發佈留言