電動車大電壞咗，係咪一定要劏？換電池又得唔得？抵唔抵？

 電動車而家越嚟越普及，好多人買車都會選擇電動車，特別係喺油價高昂嘅香港，入一升油已經要20蚊以上，即使幾鍾意油車，仲揸油車就好似對唔住自己嘅荷包咁。2025年8月至2026年7月一年間，喺香港首次登記嘅私家車有66188部，當中51893部係電動車，其餘14295部先係汽油車，即係大約3.6部出牌嘅電動私家車之中，先有1部汽油私家車出牌。由此可見，電動私家車喺香港真係非常受歡迎。

 雖然條街多咗好多電動車，但係電動車粒電池壽命有限，你又有冇諗過，萬一電動車嘅電池壞咗，咁點算呢？係咪一定要劏車？有冇得維修？換電池又得唔得？會唔會好貴？

電動車電池耐用度/壽命

  電動車電池嘅壽命有幾多？究竟襟唔襟用？答案可能出乎你嘅意料，其實電動車嘅電池可能比你想像中更加耐用。如果你喺香港條街望吓，你就會發現街上面仍然有唔少第一代Tesla Model S 喺條街度行緊，呢啲車好多車齡都有成10年以上，當中好多公里數都超過二十萬，仍然喺條街度行緊，司機甚至攞嚟做Uber等網約車平台，證明電動車嘅電池都可以係非常之襟用。

第一代Tesla Model S

  之不過雖然電動車電池雖然係可以好襟用，但係都有機會壞，例如入水，老化，或者因為撞擊受損，導致電池或者其他電子嘢需要維修，咁市面上究竟又有冇得維修呢？

電動車有冇地方可以維修，維修過程又係點樣？

  其實電動車的確係可以維修嘅，而且都有唔少選擇，除咗好貴嘅原廠維修之外，喺香港，有一啲車房係專維修電動車嘅，例如 EV-Pro Limited , EV-R 香港電動車科研環保再生 同埋 HK Tesla Repair。 如果車輛有港車北上或者中港牌，亦都可以北上大陸以更平嘅價錢搵大陸嘅車房維修，例如珠海吉大昌汽車服務中心，迅維新能源維修服務，廣州電車幫等等。

  電動車維修除咗基本嘅保養同埋更換零件之外，亦都可以維修電池。維修電池嘅方式有幾種，例如電池嘅電腦版損壞，可以維修bms電腦版。

維修電動車電池bms電腦版影片例子

  如果電池因為撞擊而損壞，亦都可以局部更換電池

局部更換電池例子

當大電池真係冇維修價值，可唔可以成塊更換？

  有啲人覺得電車電池一壞，原廠換電池報價又超貴，成部就要攞去劏，但係其實唔使一定劏車嘅，坊間亦都有人換電池，冇想像中要十幾廿萬咁貴。

  以電動車款Tesla Model 3同Nissan Leaf為例，兩款車都可以更換拆車/全新電池，例如某大陸車房幫香港牌model 3換電。

  而日產 Nissan Leaf 更加值得一提，因為有第三方廠家製作呢款車嘅全新電池，呢款車因為設計缺陷（電池冇主動液體冷卻系統），加上早期型號電池容量細，好多只得24kwh,特別多呢款車要換大電，歐美都有好多leaf換咗第三方全新大電，係一個非常值得參考嘅例子。以下係一間電池廠嘅電池喺香港安裝嘅介紹影片（英文）

從Carousell亦都見到，呢款車喺香港有電池更換服務，最貴嘅62kwh全新電池只係要73,000,電池容量即時翻倍，比買相同牌子嘅全新車，或者差唔多規格嘅全新國產電動車，例如價值13萬但係電池容量得55kwh嘅aion es平唔少，絕對係慳錢又環保嘅好選擇。

總結

  由此可見，電動車壞咗唔係冇得整，即使要換大電，都唔係問題。至於小問題嘅故障，中港兩地都有唔少識整電動車嘅車房可以揀，隨着越嚟越多人買電動車，相信遲啲會有更多整電動車嘅車房出現，維修電動車只會變得越嚟越容易同埋平價。

（Disclaimer: 呢篇文章店舖資料係喺網上面搵嘅，本人冇接受任何贊助，亦同商家冇任何關係，喺幫襯任何提到嘅商家前，請核實商家背景同埋聲譽，任何與商家產生嘅問題均與本人無關，亦無需賠償任何損失）

(文章由本人 Vincent 親自編寫）